Զեկ. ԱՐԹՈՒՐ ՍՏԵՓԱՆՅԱՆ

  Համայնքների խոշորացումից հետո, տարեց-տարի նվազել է գրադարաններից օգտվող ընթերցասեր քաղաքացիների քանակը, ինչի հետևանքով համայնքապետարանի հաստիքացուցակում տեղի են ունեցել փոփոխություններ։ Որոշ գրադարանավարների հաստիքներ կրճատվել են և դրանց պարտականությունները կատարել են մշակութային միջոցառումների կազմակերպիչները, որն ըստ  էության իրեն չի արդարացրել։ Միջոցառումների սակավության և մշակույթի տների անգործության  պատճառով, ընթացքում այդ հաստիքները ևս կրճատվել են։

   Վայոց Ձորի մարզի Եղեգիս համայնքի Արտաբույնք, Հորբատեղ, Հերմոն, Գողթանիկ,Վարդահովիտ, Հորս, Եղեգիս, Շատին, Քարագլուխ և Աղնջաձոր գյուղերի վարչական ղեկավարների նստավայրի գրադարանները տարիներ շարունակ չեն ծառայել իրենց նպատակին և չեն ծառայում, հնարավորչի եղել գրքերը տրամադրել ընթերցասեր բնակչությանը և դպրոցական երեխաներին, ինչն աշխարհընկալման և գիտելիքների ձեռք բերման դերում բացասական  է անդրադառնում:

   Ելնելով վերոգրյալից, ղեկավարվելով Հայաստանի Հանրապետության քաղաքացիական օրենսգրքի 685-րդ հոդվածի պահանջներով, «Տեղական ինքնակառավարման մասին» Հայաստանի Հանրապետության օրենքի 18-րդ հոդվածի 1-ին մասի 21-րդ կետով

Ա Վ Ա Գ Ա Ն Ի Ն   Ո Ր Ո Շ ՈՒ Մ   Է

 1.Հայաստանի Հանրապետության Վայոց Ձորի մարզի Եղեգիս համայնքի Արտաբույնք, Հորբատեղ, Հերմոն, Գողթանիկ, Վարդահովիտ, Հորս, Եղեգիս, Շատին, Քարագլուխ և Աղնջաձոր գյուղերի վարչական ղեկավարների նստավայրի գրադարանները և գրադարակները համաձայն հաստատված գույքացուցակի, անհատույց, անորոշ ժամկետով օգտագործման հանձնել Եղեգիս համայնքի վերոնշյալ գյուղերի դպրոցներին։    2.Սույն որոշման պահանջները կատարել որոշումն ուժի մեջ մտնելուց հետո մեկ ամսվա ընթացքում և որոշման պահանջների կատարումը հանձնարարել Եղեգիս համայնքի ղեկավարի 1-ին տեղակալին և նշված գյուղերի  վարչական ղեկավարներին: 

3.Որոշման գործողությունը տարածվում է մինչև, անհրաժեշտության դեպքում, համայնքի ղեկավարի պահանջով գրքերը գրադարաններին վերադարձնելը:

    4.Սույն որոշումն ուժի մեջ է մտնում ընդունման պահից։